Pastorada 2007

 
Mayoral
Ignacio Barbero
Repatán
Monchu Roble
 

Mayoral

  1. Biembenido sía? 
    iste seleuto auditorio
    de o que pasa por o mundo
    yo quio daros notorio.
  2. En o mío nombre y de os lanzantes
    en primeras quereba agradezer
    que estez con tanta atención
    toa ista caterba chen.
  3. Que mamá siempre me ha dito
    que o primero ye a educazión
    pos si por algo me podez carrañar
    no ye ixa a mía intenzión.
  4. Si ez parau cuenta
    que a mía fabla ye un siñal aspra...
    Buen cabal!
    Santa Orosia me entiende,
    que yo le charro a ella
    dende aíntro d’ a mía alma.
  5. Grazias tamién a os romeros
    que de tantos lugars eis plegau
    con o ropón y o palo
    como tantos antepasaus.
  6. Grazias a os cruzeros
    que’n bienen de toda a Montaña
    trayez a millor joya buestra
    pa engalanar ista fiesta.
  7. Y a os zereños banderistas
    de ro Balle y Sobrepuerto.
    Qué argüellosos nos sentimos
    de que abandiez sin rangüello!
  8. Memoranza pa os que iste día
    con nusotros no puen estar
    Santa Orosia se alcordará
    de a fé que le eis tenido en bida.
    Punto
    Cantas
  9. ¡Cuánto gozo, qué contento
    de golber-nos a alcontrar
    pa astí chuntos zilebrar
    a fiesta e Santa Orosia!
  10. ¡Ixe beso que se dan
    cruzes, palos y banderas
    ye un beso d’ amistá
    entr’as chens d’a nuestra tierra!
    Mayoral
  11. Dimpués de a presentazión
    no cal fer-se a rogar
    tos presento a o compañero
    lo clamamos rebadán
  12. dizen que ye o suyo ofizio
    pero no le imos bisto enganchar
    ?
    de gambada toz os días
    y namas que pajariquiar.
  13. Y a pue fer día güeno
    que toz pa él barruntan agua,
    siempre lo bierás bien cubierto
    y en a tabierna de millor gana.
  14. Dize que si está o sol blanco
    tenemos agua n’ o campo
    y si o sol está ancho
    coflau en bella mosquera
    no'n pasa miaja e pena
    igual caye una coscadeta.
  15. No’ n conoze de andalorzios
    tampoco no d’escañacrabas
    con o buchorno pai que s’afoga
    ¡Qué güen orache fa en casa!
  16. Toz os días s’amallata
    asta güena ora n’cama,
    y a caseta d’o pastor
    le’n imos tenido que apañar
    con aire acondizionau
    y a telebisión digital.
  17. Y o malbibo en casa amprada
    con goteras n’ o tellau
    y si m’ escuido luego espaldada
    y o rebadán sin d’embargo
    me demanda un adosau
    u bel alpartamento n'o Lambado.
  18. Imos a ejar-le charrar
    que si no igual rebienta
    pero cuida d’o que dirás
    que empezipias y no paras cuenta.
    Punto
    Rebadán
  19. ¿Qué tal plantas, mayoral?
    Fa días que no te bieba,
    que no sé de tú garra,
    ya pai que uloras a fiesta...
  20. Abrás estau de lifara
    y ista nuei güena zorrera
    no ejarás de cayer-te largo
    y amostrar-nos a meliquera.
  21. No sé t’ ande abrá pegau n'o imbierno
    en tres meses de bacazions
    dizen que uscaba a calor
    por Cuba u quemisió.
  22. Cuan a la fin tornó
    de a calor d’o pecho ajeno
    no l’ en entendeba cosa
    charraba raro o trapazero.
    Busaba fer repartizión
    de to menos de ro suyo
    y que biba ra reboluzión!
  23. No conozeba ni a ra suya perreta
    y llegó a confundir a un buco
    con a burrota grisa que teneba.

  24. Sólo busaba minchar
    caquis, quibis y guayabas,
    l’ en quedó o tipo bien fino
    n’o escusau to ro día estaba.

  25. Tornó en sí de a fatera
    cuan le clabón debán d’un plato
    con caramullo e torteta,
    chingarra, chulla y panzeta.

  26. Os güellos l’ en quedón blancos
    ascape perdió a color
    y asta as garras le tremolón,

  27. y altonzes poco dimpués
    bido a berdadera fe:
    s’encomendó a ro
    cochín y renegó de Fidel.
    Punto
    Mayoral

  28. Cómo escansan en casa tuya
    de no sentir-te charrar,
    me abatanas a cabeza
    y nomas fas que meter mal.
  29. Si podese l’ espachaba
    a dormir ligero t’a cama
    pero ista nuei dará buen ferrete
    con salir a bier o ambiente.
  30. Ixa orquesta que no toca,
    nomas graman y esberrecan
    as cantas que son moda.
  31. Cuatro u zinco esgarramantas
    d’ enzima de ro tablau
    que no cantan gota
    y lo leban to grabau.
  32. A ros mosicos d’antes más
    yo los quereba recordar,
    que con cuatro trastes feban
    o baile n’o lugar.
  33. Con curdión, biolín, guitarra
    sartens, chiflos, poco más...
    as parelletas bien pretas
    ¡ixo si yera bailar!
  34. Agora no hai quien s’eche nobia,
    con Bustamante y Bisbal
    todas as mozetas bailan
    que pai que se ban a estricallar.
  35. ¿T’ande quedón
    Solanilla y Cucalón
    que cuan iban enta as fiestas
    lo pasaban de cojón?
  36. Si os mosicos de Acumuer
    y ros ziegos de Sietamo
    debantasen a cabeza
    bien amolaus y espantaus
    se’n tornarían t’a fuesa.?
    Punto
    Rebadán
  37. No te beigo ista nuei
    esqueferau de güelga en casa
    que te beigo cantando jotas
    y engoletando en a barra
  38. anque a menistra aiga dito
    que no pues fer botellón,
    y que sólo tastará o bino
    mosen n’ a consagrazión.
  39. Bien zereñas que han salido
    as nuestras chenerazions
    y bino con pan y azúcar
    toda a bida nos ne dión.
  40. Fuera toz os bizios d’o país,
    prou de bino ranzio
    y de as gotetas de anís.
    Miaja e poncho ni sopetas,
    pero a bota yo la bazio.

    (bebe)
  41. Y yo no tarto más
    y tos boi a ejar estar,
    y como no te deseyo mal
    aun te’n daré un siñal.

    (le pasa a bota a o mayoral)
    Mayoral
  42. No tos alcordaz cuan bino?
    Mister Marshall Marcelino?
    yera tiempo d’eslezions
    y os politicos se multiplicón.
  43. Una caterba toterrenos
    toz en ringlera enta Puerto.
    No sé cuanta chen beniba,
    iban d’estar un ziento.
  44. Güena bardera ejón,
    plena e roderas a pista
    Pa fer a inaugurazión
    de ras Cuebas as armitas.
  45. En diez minutos se fizo
    sin baxar-sen de l’auto en Sorna,
    con o escoscaus que iban toz
    no iban a manchar-sen as botas!
  46. Dimpués monserga y retolica,
    escansaus se ganón o sueldo,
    bien fartos ent’a cama
    y sin dengún remordimiento.
  47. Ixe día iban toz chuntos 
    igual de izquierdas que dreitas
    con os telediarios que nos dan
    pai que feban güenas parellas.
  48. Tienen tanta fatera
    que a ra chen normal nos leban
    como cagallón por zequia.
  49. Toz os días carrañaus
    nos fan estar a os ziudadanos,
    y a nusotros rai, con un clarete
    en Santiago o mundo apañamos
  50. Que si o nuebo estatuto,
    si Yesa u o Canfranero,
    que si en hai guerra n’o mundo entero.
    Buen cabal si m’ejan minchar chulla
    en o Rincón de Valero.
  51. Y pa poder rematar
    a chanzoneta y os dichos
    yo tos encargo y suplico:
    ¡Si algo tos ha molestau,
    que lo ejéis en l’olbido!
  52. ¡Pos yo en nombre de toz,
    Orosia, lizenzia tos pido
    pa poder esplicar
    con tu grazia y con tu ausilio,
  53. á iste auditorio que está
    asabelo qué atento y benigno,
    con conzieto d’escuchar
    a tuya bida y prodigios!
    Martirio de Santa Orosia
    (...)
    Culminazion d'os elogios
    Mayoral
  54. ¡Qué tos pai, oyentes míos,
    qué bida tan miragrosa,
    qué inozenzia, qué birtús,
    y qué muerte tan dichosa!
  55. ¡Ánchels se’n bajón d’o zielo
    que le trajon a corona,
    y en a palma la subión
    ellos mesmos enta a Gloria!
  56. ¡A Suprema Trenidá,
    por a suya gran fortaleza,
    le otorgó muitas grazias
    y muchismas preferenzias!
  57. ¡En ixas tronadas fieras
    nos efiende de ra piedra,
    d’ ixas brutas abenidas,
    d’ os rayos y d’ as zentellas!
  58. ¡En os partos perigrosos
    ye asaber qué medianera,
    y por ella merezemos
    o benefizio de l’ augua!
  59. ¡Ella cura endemoniaus,
    ella á ros enfermos sana,
    ella asiste á ro afligido
    y á ro que con ferbor la clama!
    Mayoral
  60. Prenzipiaré á espedir-me
    por ixe Templo sagrau,
    ixa fuen tan eliziosa
    y por iste florido prau!
  61. ¡Adiós á Cueba d’Orosia,
    lugar d’o suyo martirio,
    adiós á ixa Ilesia que fue
    d’as suyas reliquias sagrario!
  62. ¡Adiós á o siñor Retor,
    mui querido Mosen José,
    y á o siñor Pedricador,
    con clero y autoridades!
  63. ¡Pa rematar, Santa mía,
    recordanza imos de fer
    de toz os debotos tuyos
    qu’en ista zaguer añada
    ta la otro mundo se’n fuen!
  64. ¡Asinas tamién quisiera
    grazias dar á tanta chen,
    que con tan grandisma fe
    partizipó n’ista Fiesta!
  65. ¡Orosia, Santa mía!
    ¡Mira-te ta tanta chen,
    que de tan lejos binon,
    agradeze-les a suya fe
    y o gran esfuerzo que fizon!
  66. Os que escribimos y charramos
    podébamos fer-lo millor
    pero no tos quede a duda
    que se fa con güena intenzión.
  67. ¡Grazias por a buestra atenzión,
    de toz busotros yo m’espido!
    ¡Dios nos dé a Gloria Eterna
    por os siglos de ros siglos!