Pastorada 2008

 

Mayoral

  1. Biembenido sía 
    iste seleuto auditorio 
    de o que pasa por o mundo 
    yo quio daros notorio.
  2. En o mío nombre y de os lanzantes 
    en primeras quereba agradezer 
    que estez con tanta atención 
    toa ista caterba chen.
  3. Que mamá siempre me ha dito 
    que o primero ye a educazión 
    pos si por algo me podez carrañar 
    no ye ixa a mía intenzión.
  4. Si ez parau cuenta 
    que a mía fabla ye un siñal aspra 
    Buen cabal! 
    Santa Orosia me entiende, 
    que yo le charro a ella 
    dende aíntro d’a mía alma.
  5. Grazias tamién a os romeros 
    que de tantos lugars eis plegau 
    con o ropón y o palo 
    como tantos antepasaus.
  6. Grazias a os cruzeros 
    que’n bienen de toda a Montaña 
    trayez a millor joya buestra 
    pa engalanar ista fiesta.
  7. Y a os zereños banderistas 
    de ro Balle y Sobrepuerto. 
    Qué argüellosos nos sentimos 
    de que abandiez sin rangüello!
  8. Memoranza pa os que iste día 
    con nusotros no puen estar 
    Santa Orosia se alcordará 
    de a fé que le eis tenido en bida.
    Punto
    Cantas
  9. ¡Cuánto gozo, qué contento 
    de golber-nos a alcontrar
    pa astí chuntos zilebrar 
    a fiesta e Santa Orosia!
  10. Alas me das pa puyar 
    fuerzas d’ande yo no’n tiengo 
    y to por bier-le a cara 
    a ra Santa que más quiero
    Mayoral
  11. Dimpués de a presentazión 
    no cal fer-se a rogar 
    tos presento a o compañero 
    lo clamamos repatán.
  12. Dizen que ye o suyo ofizio 
    pero no le imos bisto enganchar, 
    de gambada toz os días 
    y namas que pajariquiar.
  13. Iste repatán aquí manda 
    bastante más que yo. 
    Ye o sobrino de o mainate 
    de a mafia de Nueba York.
  14. Di-le que baiga ta Tresbasa 
    que astí tiene anchas as crabas 
    dirá que agora no’n puede 
    y dimpués que igual no le baga
  15. No’n hai nadie aquí más rufo 
    ascape te se concara 
    ye mal chandro como él solo 
    pero a toas as mullers afalaga.
  16. Bergüenza poca en conoze 
    charrar poco le cuesta 
    te contará a suya bida 
    si le das una poca e cuerda.
    y si le ejas a bota 
    zerca te la dirá a trompa talega
  17. En o barrio d’as Moreras 
    ye o más gran alparzero.
    No te imbitará a brendar 
    pa ixo sí que ye mego.
  18. Poco bale de repatán 
    o suyo ye o picarazeo
    eslegió mal o suyo ofizio 
    sería o millor portero.
    Punto
    Repatán
  19. Poco tiempo as tardau 
    en ejar-me güen recau. 
    Con lo mal que está ro mundo 
    y pai que solo yo te procupo.
  20. Si yo cuento a mía bida 
    ye que no’n tiengo que amagar 
    y si charro de os demás 
    no me bierez meter mal.
  21. Por amostrar no me cuesta 
    ni de amostrar os calzons 
    pero los amuestro por abajo 
    como antes más a chen mayor.
  22. Agora os chobens t’enseñan 
    os calzons por arriba, 
    o melico y a tripaza 
    y creyen que ye cosa fina.
  23. Y as mullers con ixas bragotas 
    que paizen tirachinas, 
    no les be de tapar cosa 
    que no tapa una carrachina.
  24. Anque oi con iste trache 
    pasemos una miajeta calor 
    no me digaz que no estamos pinchos 
    y o que más entre istos, yo.
  25. Debán d’ iste auditorio 
    quereba soluzionar 
    un problema d’estau, 
    o de o imno nazional
  26. Fa días que no aduermo 
    pensando n’a Eurocopa 
    y os futbolistas conzentraus 
    cantando ro ‘chunta chunta’
  27. ¿Qué dirán Labordeta 
    y tamién Chesús Bernal 
    de que les nombren o partido 
    y sin representazión parlamental?
  28. Yo tos fago una propuesta 
    me pai que ye sobregüena. 
    Cantamos o ‘chiqui chiqui’ 
    y le femos nueba letra:

    (ritmo ‘chiqui chiqui’)
  29. En España se bibe de cojón, 
    con güena longaniza 
    le damos a o porrón.
  30. Si quiers torteta, 
    chingarra y panzeta 
    y as jodías 
    pa os que’n bienen de fuera.
  31. Te boi a ejar continar 
    antes de que empezipie a esbarrar.
    Punto
    Mayoral
  32. ¡Qué argüellosa estará mama 
    de sentir-te izir a pastorada. 
    Solo tiens que bier a tío 
    te se mira to embabuquido
  33. Con ista autuazión 
    no me cabe n’o esmo 
    como no te leban a Eurobisión. 
    Te sale un poco tarcual 
    y a yo feliz me farían 
    si te lebasen de un ramal.
  34. Iste imno lo lebaremos 
    ta o consello de as menistras. 
    ¡Imposible se metan d’alcuerdo 
    en semejante gallinero!
  35. O que nusotros sí aprobamos 
    ye a figura pa iste monte 
    de paisache protegido.
  36. Un monumento a ra memoria 
    de ra chen de Sobrepuerto. 
    Un monumento a ra belleza 
    d’istos mons y d’istas balles.
    Un monumento a os que aquí estamos 
    chuntos bibiendo ista fiesta.
  37. Que se preben de lebar-sen
    ni una sola piedra 
    de dengún d’istos lugars 
    y de ras suyas casas biellas.
  38. Que se preben de ficar 
    molinos de biento u canteras, 
    que se preben de fer más 
    ni una sola esferra.
  39. Agora faré una parada 
    no me tienga que sentir 
    como Chávez d’o rei d’España 
    Por qué no te callas!
    Punto
    Repatán
  40. S’achuntón Zapatero 
    y o bezino Sarkozy, 
    que pa qui no’n sepa 
    ye o marido e Carla Bruni. 
    Charrón de o Canfranero 
    y os dos dijon que oui.
  41. Que se fería ascape 
    en que unos euros alcontrasen, 
    pero se los chugón en o casino 
    que les cuaca de ir ormino.
  42. Luego irán enta os Monegros 
    que ban a ejar d’estar desiertos, 
    enta ixe Gran Scala 
    que plega en ora mala.
  43. Ista nueba cabañera 
    ya no se ba a fer con güellas 
    y o que antes yeran sasos 
    serán fieros espantallos.
  44. Casaluzios pa chugar a ruleta 
    y dejar-sen güenas pezetas. 
    Foranos a tutiplén 
    por abión, auto u tren.
  45. No tardarán en cambear 
    en L’Almolda a fabla ofizial. 
    Podrá estar o franzés, 
    u alemán u l’inglés.
    Fer o que quieraz, 
    que en casa mía
    charramos aragonés.
  46. Si tiens a pocha plena 
    bes a chugar-te os diners. 
    Pasarás güen rato de nierbos 
    igual no plegas a fin de mes.
  47. A ixe que le pasó 
    a muller le asperó en casa 
    Qué manera de mallar-lo 
    que cuasi lo estricalla!
  48. A dormir en o sulero, 
    con a lomera doblada 
    sin zena ni colazión 
    en toda a semana.
  49. Si tú te quiers fer rico 
    no cal ir enta o Casino 
    con un pilotazo urbanistico 
    serás o millor siñorito.
    Punto
    Mayoral
  50. No sé quién irá ta ixe casino 
    con a crisis que lebamos, 
    sube to menos o jornal 
    y no paramos de malfurriar. 
    Anque fagan a debantadera
    ni ra Expo podré bisitar.
  51. Tiengo que sacar-me o auto 
    por o prezio d’a gasolina 
    ¡Y cómo se ha puesto ro pienso! 
    Pa comprar cuatro güegos
    boi a bender-me as gallinas.
  52. Os cochins fuera d’a zolle 
    millor estarán por o monte 
    ya se pueden abezar 
    a minchar-se to ro glan.
  53. A casa en a que bibo 
    ye propiedá de ro banco 
    zincuanta añadas pa pagar 
    ¡ya me pue quedar güen retiro!
  54. O unico que nos ne queda 
    que pa comprar una cadiera 
    podemos marchar ta ro Ikea.
    Cuatro tuercas chikichaiser, 
    tres tablotas kuntakinting 
    y apáña-te-las como puedas 
    igual en bez de cadiera
    te sale una escamilleta. 
    Punto
    Canta
  55. Te conozié n’iste Puerto 
    me prendé de tú y d’a Santa 
    dende antonzes siempre biengo 
    porque si no, algo me falta
    Mayoral
  56. Y pa poder rematar 
    a chanzoneta y os dichos 
    yo tos encargo y suplico: 
    ¡Si algo tos ha molestau, 
    que lo ejéis en l’olbido!
  57. ¡Pos yo en nombre de toz, 
    Orosia, lizenzia tos pido 
    pa poder esplicar 
    con tu grazia y con tu ausilio,
  58. á iste auditorio que está 
    asabelo qué atento y benigno, 
    con conzieto d’escuchar 
    a tuya bida y prodigios!
    Martirio de Santa Orosia
    (...)
    Culminazion d'os elogios
    Mayoral
  59. ¡Qué tos pai, oyentes míos, 
    qué bida tan miragrosa, 
    qué inozenzia, qué birtús, 
    y qué muerte tan dichosa!
  60. ¡Ánchels se’n bajón d’o zielo 
    que le trajon a corona, 
    y en a palma la subión 
    ellos mesmos enta a Gloria!
  61. ¡A Suprema Trenidá, 
    por a suya gran fortaleza, 
    le otorgó muitas grazias 
    y muchismas preferenzias!
  62. ¡En ixas tronadas fieras 
    nos efiende de ra piedra, 
    d’ixas brutas abenidas, 
    d’os rayos y d’as zentellas!
  63. ¡En os partos perigrosos 
    ye asaber qué medianera, 
    y por ella merezemos 
    o benefizio de l’augua!
  64. ¡Ella cura endemoniaus, 
    ella á ros enfermos sana, 
    ella asiste á ro afligido 
    y á ro que con ferbor la clama!
    Mayoral
  65. Prenzipiaré á espedir-me 
    por ixe Templo sagrau, 
    ixa fuen tan eliziosa 
    y por iste florido prau!
  66. ¡Adiós á Cueba d’Orosia, 
    lugar d’o suyo martirio, 
    adiós á ixa Ilesia que fue 
    d’ assuyas reliquias sagrario!
  67. ¡Adiós á o siñor Retor, 
    mui querido Mosen José, 
    y á o siñor Pedricador, 
    con clero y autoridades!
  68. ¡Pa rematar, Santa mía, 
    recordanza imos de fer 
    de toz os debotos tuyos 
    qu’en ista zaguer añada
    ta la otro mundo se’n fuen!
  69. ¡Asinas tamién quisiera 
    grazias dar á tanta chen, 
    que con tan grandisma fe 
    partizipó n’ista Fiesta!
  70. ¡Orosia, Santa mía! 
    ¡Mira-te ta tanta chen, 
    que de tan lejos binon, 
    agradeze-les a suya fe 
    y o gran esfuerzo que fizon!
  71. Os que escribimos y charramos 
    podébamos fer-lo millor 
    pero no tos quede a duda 
    que se fa con güena intenzión.
  72. Grazias por a buestra atenzión, 
    de toz busotros yo m’espido! 
    ¡Dios nos dé a Gloria Eterna 
    por os siglos de ros siglos!