Pastorada 2009

 

Mayoral

  1. Biembenido sía
    iste seleuto auditorio
    de o que pasa por o mundo
    yo quio daros notorio.

  2. En o mío nombre y de os lanzantes
    en primeras quereba agradezer
    que estez con tanta atención
    toa ista caterba chen.

  3. Que mamá siempre me ha dito
    que o primero ye a educazión
    pos si por algo me podez carrañar
    no ye ixa a mía intenzión.

  4. Si ez parau cuenta
    que a mía fabla ye un siñal aspra
    Buen cabal!
    Santa Orosia me entiende,
    que yo le charro a ella
    dende aíntro d’a mía alma.

  5. Grazias tamién a os romeros
    que de tantos lugars eis plegau
    con o ropón y o palo
    como tantos antepasaus.

  6. Grazias a os cruzeros
    que’n bienen de toda a Montaña
    trayez a millor joya buestra
    pa engalanar ista fiesta.

  7. Y a os zereños banderistas
    de ro Balle y Sobrepuerto.
    Qué argüellosos nos sentimos
    de que abandiez sin rangüello!

  8. Memoranza pa os que iste día
    con nusotros no puen estar
    Santa Orosia se alcordará
    de a fé que le eis tenido en bida.
    Punto
    Cantas

  9. ¡Cuánto gozo, qué contento
    de golber-nos a alcontrar
    pa astí chuntos zilebrar
    a fiesta e Santa Orosia!

  10. Alas me das pa puyar
    fuerzas d’ande yo no’n tiengo
    y to por bier-le a cara
    a ra Santa que más quiero
    Mayoral

  11. Toz os días siento n’o Barrio
    o cara que está ra bida
    y dizen n’o telediario
    que zarran otra fabrica.

  12. Os ricos, igual de ricos,
    os esqueferaus sin salario
    y a zarracatralla e chen normal
    que no adubimos con os pagos.

  13. Agora embede sudokus
    con o jornal que nos ne queda
    imos de fer unos ‘sueldokus’
    y ni asinas nos salen as cuentas.

  14. Nomas espachan a os que treballan
    os mandamases siguen bien fartos.
    cofladizos en a cadiera
    y sin pasar miaja e mal rato!

  15. Ya nos ha plegau a crisis,
    no’n dan una de ipotecas.
    Os d’o banco en que te beyen
    ascape te trancan as puertas.

  16. Antes sí que te quereban,
    pa chupar-te as cuatro perrotas.
    Agora que no tiens cosa
    a escaparrar t’espachan ta fuera.

  17. Ye normal tanta fatera?
    A yo rai. No paso gota e pena.
    M’encomiendo a Santa Orosia
    y astí que empezipie a fiesta.

  18. Ista nuei femos güen baile,
    güena borina en casa nuestra,
    que no falte güena lifara
    y a remojar a gargamela.
    Punto
    Rebadán

  19. Tres consellos te daré
    pa enrestir mielsudo a crisis
    Paren cuenta en Wall Street
    que astí ban os míos analisis.

  20. A tú que yes bien rufo
    no’n sé si te farán falta.
    No te se ha bajau a pez ta o culo?
    Que inantes no parabas en casa
    con ixo d’os buelos baratos
    de bier mundo no te’n queda garra.

  21. Ixe aeropuerto de Monflorite
    a yo almirazión me causa.
    U os abions irán a pedals
    u tendrás que ir batendo as alas.

  22. Pero no me cabe n’o esmo
    que te cueste un biache ta Franzia
    igual que una talega e patatas.
    Pue que acabes en ixos asientos
    doblau como una cañabla
    y sin endrezar en una semana.

  23. Si marchas enta o mercau
    bierás t’ande han puyau os prezios.
    A soluzión la tiens en casa,
    en o mon y n’o tuyo güerto.

  24. No t’alcuerdas cómo yera
    o sabor d’as galimbastas,
    d’os manzañons y d’as zerollas,
    toas yeran bien baratas.

  25. Te se ha puesto o morro fino
    dende que chugas a o Golf de Latas
    No t’alcuerdas o que has xarticau
    y de cuan entrecababas patatas.

  26. Si no tamién puez fer
    o que o mío lolo me contaba
    pertocando a os suyos pies
    con o calzero de estar por casa.

  27. Un día lo calzaba a dreitas,
    a la otro’l día al bies
    y asinas no se gastaban.
    Pero ixo sí, le goleban un poqué.

  28. Agora no charraré más
    que m’han dito que’n hai d’espías
    y creigo que as güellas leban
    microfonos en as esquillas.

  29. No’n sé si son de Asperanza
    u si son de Gallardón,
    nomas sé que as nuestras crabas
    con os bucos no se achuntan
    pa que dimpués no alparzíen
    a suya combersazión.

  30. No les faltarán antiparras
    ni gambeto a ixos espías.
    Yo no sé o que fatían
    que entre ellos se cosiran
    y a nusotros no mos ejan en paz.
    Punto
    Mayoral

  31. De toas as fatezas que charras
    Algo e razón no te’n falta.
    No sé si endrezamos d’ista.
    Que a yo ya me cansan
    os patacazos que da a bida.
    Imos a tirar t'alante
    ent'atrás ni pa pegar remetida.

  32. Agora plega o mío consello:
    Aquí tiens güen treballo
    bien joriau y a saber qué sano.
    Tres meses en iste Puerto
    rodiau de mardanos y segallos
    y d’o jornal… ya charraremos.

  33. Cal tener bocazión
    pa estar un güen pastor
    y asinas que cuasi están
    en perigro de estinzión.

  34. Será difízil que bella bez
    pleitíes con qui no quiers.
    Tan caro que por iste mon
    te trobes bella manifestazión.

  35. Si tiens problema de sueño
    te adormirás si yes pastor
    al cabo e tarde acabas canso
    como un can cortejador.

  36. No siempre fa güen orache
    ormino te tendrás que amallatar
    en o primer cado u cubilar
    que p’astí te puedas trobar.

  37. Chalamancau rematarás
    cuan tiengas que esquirar.
    As ancas y ros riñons
    no ejarán de fer-te mal.

  38. No cal que fagas un máster
    ni formazión a distanzia,
    nomas una miaja e talento
    y echar-le un siñal de ganas
    pa que no acaben as bacas
    enronadas en o suyo fiemo.

  39. Ya nadie quie estar mayoral
    ni os campos suyos labrar,
    sincusas to ro mundo dan.
    Dizen que ye mal ofizio
    y con tarcual benefizio
    pero yo con as mías bacas
    corders, güellas y crabas
    pa comer cosa me falta.
    Punto
    Rebadán

  40. No parez muita cuenta
    de to ro que diga iste mayoral.
    Charra y esbarafundía
    y a ra ora de cumplir se le olbida.

  41. Si me tenese que afirmar yo agora
    pa ratos lo feba con él.
    En esti año pasau
    un día de bacazions me dies
    pa autuar con os lanzantes
    en a Expo de Zaragoza.

  42. Y de to ro que allí aprendiés
    no se te’n ha quedau cosa.
    Con tantisma agua y tanta chen
    en zagueras cuasi te afogas.

  43. Igual que no ye o mesmo
    goler que ulorar,
    puez contar que no ye o mesmo
    escusar que no gastar.

  44. Preba de no malmeter
    o bien escaso de l’agua.
    Solo tiens que mirar pa istas fechas
    o eslanguido que baja Basa.

  45. Pero en ixe afán de escusar
    no baigas a no gastar
    cuan se trata de l’agua
    en a higiene personal.

  46. Pai que bas marcando
    o terreno como os cans,
    que yes un ombre que eja rastro
    pero no por tu personalidá

  47. Que o bayo que bas ejando
    en a nariz s’eja notar
    y prezisamen no son rosas
    o qu’ejas allá t’ande bas.

  48. Más se paize a ra ulor
    de l’agua que antes más
    n’ixe cobalto de Yebra
    de ra fuen d’os Palomos
    no paraba de manar.
    Punto
    Mayoral

  49. O unico que pai
    que no le ha tocau a crisis
    ye o Güesqueta de fútbol
    que no para e poner gols
    en a segunda dibisión.

  50. Tampoco no ye to desgrazias,
    bien qu'escusan as mozetas
    en os bestidos a tela,
    cuasi no se'n tapan cosa,
    enseñan asta ebajo a meliquera.

  51. Menistros y deputaus
    toz a treballar de rezio,
    tiengan salida os paraus
    y no puyen más os prezios.

  52. Tos chuntos lo imos de fer
    que ista Fiesta, iste Mon,
    nunca conozcan a crisis,
    que asinas nos lo enseñón
    os nuestros antepasaus.

  53. En nombre de Santa Orosia
    ye obligau reconozer
    os grandismos esfuerzos
    de tantisma güena chen.

  54. En ista zaguer añada:
    os arreglos d'o Camino
    y declarando ista Montaña
    como paisaje protegido.

  55. Y pa poder rematar
    a chanzoneta y os dichos
    yo tos encargo y suplico:
    ¡Si algo tos ha molestau,
    que lo ejéis en l’olbido!

  56. ¡Pos yo en nombre de toz,
    Orosia, lizenzia tos pido
    pa poder esplicar
    con tu grazia y con tu ausilio,

  57. a iste auditorio que está
    asabelo qué atento y benigno,
    con conzieto d’ascuitar
    a tuya bida y prodigios!
    Punto
    Canta

  58. Te conozié n’iste Puerto
    me prendé de tú y d’a Santa
    dende antonzes siempre biengo
    porque si no, algo me falta